Dili – Comissão Anti-Corrupção (CAC) hahu servisu tinan 2016 nian hodi halao sorumutu ho Nai Prezidenti Republika Taur Matan Ruak (TMR) iha Palácio Aitarak Laran. Objetivo husi sorumutu ne’e informa ba Nai Prezidenti Repúblika kona-ba servisu CAC nian iha tinan 2015 kotuk.
Komisáriu Tilman mos informa ba Nai Prezidenti Repúblika kona-ba estratéjikas prioridades Comissão Anti-Corrupção nian ba tinan 2016 ne’ebé konsentra (1) Prevensaun korrupsaun no Boa Governasaun iha eleisaun (2) Ajuste Interna ba iha Organizasional no Institusional CAC (3) Dezenvolvimentu draftu Estratéjia Nasional Anti-Korrupsaun.
Nai Ulun Prezidenti Repúblika, Taur Matan Ruak felisita CAC nian kontinuasaun servisu iha esforsu prevene no kombate korrupsaun no ninian komprimisu atu reforsa kooperasaun institusional iha nível nasional no internasional para atu kombate korrupsaun frente hotu. “Korrupsaun hanesan moras kroniku ida ne’ebé destroi dezenvolvimentu bem-estar povu rai ida ne’e nian. Tamba ne’e, Prezidenti Repúblika sempre apoia servisu CAC nian tuir mandatu legal hodi luta kontra korrupsaun,” Prezidenti Republika TMR konkluiu.
CAC reprezentante husi Komisariu Adérito Pinto Tilman, Komisariu Adjuntu Prevensaun no Sensibilizasaun Publiku Jsé “Sama Larua” Neves, Komisariu djuntu ba Apoio Tekniku no Kooperasaun Manuel Bucar no Adviser ba UNCAC, Kooperasaun Internasional no Institusional Jonas Guterres. (*)
