Featured Stories / Mensajen

Mensajen Komisáriu CAC Foun Tilman: Mai Ita Servisu Hamutuk Kontra Korrupsaun

by

Dili – Iha nian primeiru liafuan murak ba funsionariu Commissão Anti Corrupção (CAC), Komisáriu foun Dr. Adérito António Pinto Tilman hateten klaru katak dalan diak atu prevene no kombate korrupsaun iha Timor-Leste mak servisu hamutuk nudar ekipa ida.
Jerente Senior CAC ofisialmente introdus Komisáriu Tilman ba staff no investigador sira horseik (24/7) loraik.
Dr. Adérito iha nian intervensaun hateten Parlamentu Nasional (PN) eleitu nian sai Komisáriu mai lidera Komisaun. Nia hateten nian papel laos atu mai reforma strutura ne’ebé estabelese tiha ona maibe atu reforsa, hametin no tenta atu rezolve problema ruma instituisaun nian hodi hasoru dezafius hamutuk ho staff CAC tomak.
“Hau mai iha ne’e laos para atu sobu Komisaun. Hau mai para atu reforsa tan saida mak Komisáriu uluk kompleta ona ho Adjuntud nain rua halo hamutuk ho kolega sira seluk. Iha buat diak nebe mak ita sei mantein, no iha failansu oituan ita presija atu hadian. Tamba ne’e, durante hau nian tempu iha ne’e, hau sei kontinua hili Komisáriu Adjuntus nain rua ne’ebé ezisti tiha ona,” katak Komisáriu Tilman.
Komisáriu Tilman kontinua espresa konfiansa katak Komisáriu José A. Neves no Manuel Bucar, staff CAC tomak no investigador sira sei servisu hamutuk durante tinan hat iha Segundu Mandatu ne’e hodi hasoru dezafius iha esforsu prevene no kombate korrupsaun iha future.
Durante Segundu Mandatu, husi tinan 2014-2018, funsionariu CAC sei focus hodi hasa’e no hametin konsiensializasaun atu hari’I integridade etika no profesionalizmu iha servisu públiku no komunidade. KOmisáriu Tilman mos indika katak nian prioridade primeiru mak sei lobi governu no Parlamentu Nasional atu aprova lei organiku CAC iha tinan ne’e.
Komisáriu mos apela ba staff tomak atu la divulga kualker informasaun konfidensial ne’ebé iha instituisaun laran ba iha publiku. Komisariu husu investigador sira atu hanoin katak lei mak sira nian biblia ba investigador sira, nune’e sira tenki nafatin iha nafatin korajen atu halao servisu investigasaun diak, maneira legal.
“Ita tenki unidu hodi halao servisu ho konfidensialidade no integridade. Wainhira ita unidu, ita nian instituisaun sei forte, ema no organizasaun seluk husi liur sei reseu ita”.
“Ita labele hakruk ba politiku nain sira. Sira bele halo estatementu politiku iha jornal ka media, maibe ita labele responde politikamente – tenki responde ho tekniku juridikamente hanesan investigador,” Komisariu Tilman hatutan teni.
Komisáriu Tilman mos hateten instituisaun estadu ne’ebé iha relasaun servisu ho anti-korrupsaun presija iha kolaborasaun servisu hamutuk. Prevene no kombate korrupsaun iha mundo tomak hanesan servisu boot ida, nune’e instituisaun ida mesak labele halo buat ida.
“Instituisaun hotu-hotu tenki servisu hamutuk hodi fo laran ba malu. Labele dehan instituisaun ida mesak bele halao prevene no kombate korrupsaun iha rai ida ne’e. Ita kapasita a’an hodi infrenta dezafius iha futuru,” katak Komisáriu.
Primeiru etapa iha programa CAC nian sei hili hikas no halao serimonia tomada de posse ba Komisariu Adjuntus nain rua iha loron 30 fulan Julhu iha Salaun Delta Nova, tuir mai husu ba Prokurador Jeral da Republika atu normaliza hikas situasaun investigasaun nian ne’ebé mak para tiha oituan durante fulan hirak nia laran iha tinan ne’e. (*)

Previous postParliament Elects Adérito Tilman As Next CAC Commissioner Next postKomisáriu Adjuntus CAC Simu Posse

Popular

Mensajen Komisáriu CAC Foun Tilman: Mai Ita Servisu Hamutuk Kontra Korrupsaun