Dili – Lider komunitariu no estudante sira husi nivel eskola baziku to’o sekundariu besik 1000 atende workshops serial iha distritu diferente tolu ne’ebé organiza husi Comissão Anti-Corrupção (CAC).
Workshops halao iha distritus Dili, Viqueque no Lospalos.
Topiku workshop ba lider komunitariu sira mak “Kultura Kombate Korrupsaun Hahu husi Familia” no topiku workshop ba estudantes sira mak “Onestidade Nudar Xavi Importante Ba Estudante Sira Atu Hadok-an Husi Korrupsaun”, ne’ebé molok ne’e halao ona mos ba estudantes sira iha Dili .
Aitividades edukasional ne’e CAC realiza hanesan parte husi edukasaun sivika CAC nian atu prevene pratika korrupsaun hanesan kauza ida nebe fo influensia maka’as hodi estraga povu nia moris diak, hafoer estadu nia dignidade no hamate integridade no moral iha aspektu politika no boa governasaun. Hametin konhesimentu sosiedade kona-ba prevene no kombate korrupsaun.
Ba ida ne’e, CAC labele hamo’os korrupsaun iha Timor-Leste mesak – sidadaun hotu tenki utiliza forsa koletivu kombate korrupsaun, no ami sei suporta esforsu ne’e hotu hodi fortifika konhesimentu no oferese meius hodi hateten lae ba korrupsaun iha moris lor-loron nian.
Atu halo ida ne’e, Comissão Anti-Corrupção (CAC) iha nia knar no responsabilidade oinsa halibur no informa lider komunitáriu, veteranus, organisasaun feto no jovens, Partidus Polítiko, profesóres, estudantes no konfisoens religiosos atu habelar informasaun liu husi dalan sorumutu ho komunidade iha eskolas, sukus, , Sub-Distritu no Distritus hotu iha TL laran tomak.
Partisipantes sira ativa ho antusiamu maka’as tuir workshop atu hatene kona-ba oinsa kontra pratika korrupsaun iha sira nian moris loron-loron durante workshop.. Estudante no partisipante sira mai ho sira nian perguntas kritikus konstrutivu no rekomendasaun kona-ba esforsu luta kontra korrupsaun iha TL.
Diretor Edukasaun e Peskiza, Rosario de Araujo no director Prevensaun Abrão Freitas lidera ekipa rua ba halao sorumutu serial ne’e.
Lider komunitariu sira iha sub-distritus Ossu, Watucarbau, Lacluta no sub-distritu Viqueque Vila. Workshop ba estudante sira halao iha Eskola Sekundaria Watucarbau, Eskola Sekundaria Ossu, Eskola Sekundaria Santo Antonio Lacluta, Eskola Sekundaria Santo Estevão Viqueuqe Vila no lider komunitariu ho estudantes vokasional Becora Dili.
CA sei kontinua halao seminar sira hanesan ne’e iha teritoriu tomak. Nune’e mos, ekipa ida oras ne’e iha dalan ba Distritu Maliana atu realiza workshops kona-ba prevene korrupsaun semana ne’e. (*)
