Featured Stories

Eransa Ida Nebé Lori CAC Ba Iha Futuru

by

Eleitu sai Primeiru Komisáriu Commissão Anti Corrupção (CAC) iha loron 22 Fulan Fevereiru tinan 2010 iha Uma Fukun Parlamentu Násional (PN), Adérito de Jesus Soares simu responsabilidade Estadu ne’ebé povu Timor-Leste (TL) tula ba nia ho orgulhu no prestiju tomak hodi servi nia povu no nasaun TL.

Komisáriu Adérito Soares simu knar todan ida ne’e husi PN, ho ida ne’e, estabelese CAC hamutuk ho nian belun boot nain rua nia rasik eskolha; Komisáriu Adjuntu José Antonio de Jesus das Neves no Komisáriu Adjuntu Manuel Countinho Bucar Corte Real. Hahu husi Komisáriu nain tolu iha tinan 2010, sira nain tolu haburas to’o iha tinan 2014 ho staff hamutuk nain 71 ona.

Asaun primeiru iha mandatu Komisáriu Soares nian mak estabelese Vizaun CAC nian “Timor-Leste Estadu demokrátiku ida ho kultura rejeisaun korrupsaun ida mak forte ba interese no prosperiedade povu nian” ho Misaun “Kombate korrupsaun liu husi dalan prevensaun, edukasaun no investigasaun”.

Iha primeiru mandatu Komisáriu, CAC konklui investigasaun kriminál korrupsaun balun, ezekuta programa edukasionál no prevensaun sira hodi halao sorumutu no workshop ne’ebé involve estudantes barak, servisu nain ONG sira, veteranus, lider komunitáriu, konfisoens relijiosas no funsionáriu Estadu iha teritoriu tomak ho diak.

Iha Komisáriu Adérito nian mandatu, CAC investiga ona offisiais governu nivel a’as balun ba indikasaun krimi korrupsaun. CAC simu despaixu husi Ministeriu Públiku hamutuk 73 kazus, no to’o ohin loron, CAC investiga no kompleta ona relatoriu hamutuk 69 kazus. Halao sorumutu públiku ka workshops liu 100 iha teritoriu tomak hanesan parte edukasaun ka kampanha sensibilizasaun ba públiku. CAC konklui numeru relatoriu tekniku, peskiza balun inklui perkiza persepsaun korrupsaun iha TL no peskiza integridade ba seitór públiku.

Maske hasoru dezafius oin-oin, Komisáriu Soares konsege estabelese rede servisu efetivu ho entidades lubun ida iha TL; governu, PN, media no ONG sira.

Komisáriu Adérito liga instituisaun CAC ho ajensia anti-korrupsaun iha mundo no iha ita nian rejiaun, hanesan Indonesia, Malaysia, Singapura, Hong Kong, Australia no Estadus Unidus Amerika, dezenvolve rede internasionál tamba rekonese korrupsaun la para iha nasaun ida no liu fronteira nasaun.

Komisáriu Adérito Soares hamutuk ho Komisáriu Adjuntu nain rua mós servisu ativamente ho ajénsia internasionál hodi dezenvolve programa luta kontra korrupsaun iha TL – servisu hamutuk ho UNODC (United Nations Organization of Drugs and Crime), UNDP (United Nation Development Programme) no partikularmente ho FOTI-USAID (Fostering Transparency and Integrity-United States Agency of Aid and Development. Dirijente Senior no officiais CAC nian mós partisipa ativamente – konferénsia no treinamentu sira iha rai laran no mos iha rai liur.

Maske otas instituisaun CAC sei nurak, Komisáriu lidera CAC lori Estadu TL nian naran halibur ajensia anti korrupsaun husi nasaun seluk hamutuk 29 iha Konferénsia Internasionál ida iha Fulan Julhu tinan kotuk; 18th Steering Group Meeting and 12th Regional Seminar, ADB-OECD Anti-Corruption Initiative For Asia and the Pacific iha Dili. Nia mos representa ADB-OECD no aprezenta relatório iha Konferénsia Estadu parte UNCAC (United Nations Convention on Anti-Corruption) nian iha Panama iha fulan-Novembru 2013.

Ida ne’e klaru katak lideransa diak durante Primeiru Mandatu Komisáriu nian hodi lidera instituisaun CAC husi zero to’o ohin loron ho naran morin no reputasaun iha TL, nune’e mos iha mundo internasionál. Agora servisu sei fasil liu ba Komisáriu foun hodi kontinua servisu diak ne’e iha future, ho projeitu sira hanesan lei deklarasaun rikusoi, planu estratejiku nasional ba anti-korrupsaun.

Hamutuk, Dirijente Senior tula matenek ba malu konsege lori instituisaun nurak ne’e konvense povu no Estadu TL ho sira nain tolu nian abilidade kontra korrupsaun liu husi servisu la sente kolen no aprosimasaun badinas.

Husi rekrutamentu staff, fortalesimentu infstituisional (konstrusaun edifisiu CAC), kapasitasaun ba staff sira, hametin kooperasaun instituisional iha rai laran no haberan kooperasaun internasional, iha Komisáriu Adérito nian okos sai instituisaun ida forte hanesan sira nian liman fatin ne’ebé istoria CAC sei hakerek ho tinta osan mean.

Bazeia ba nian prestasaun iha tinan hat nian laran, Timor oan tomak iha obrigasaun moral atu la tatoli liafuan Goodbye ba Komisáriu Adérito Soares, maibe hanoin hikas  oinsa nia esforsu tomak hodi tulun instituisaun CAC ba nasaun nian diak iha nebé sei tulun asegura TL nian future.

Servisu diak nebé Primeiru Komisáriu CAC atinji akompanha ho memoria diak sira no relasaun ho instituisaun sira seluk hanesan eransa ida. Ho forsa ida ne’e ita espera bele konvense Timor oan sira tau sira nian fiar no esperansa iha CAC hodi luta kontra krimi korrupsaun iha ita nian rai doben, Timor-Leste.

Ita espera nia diak iha nian estudus iha Australian National University (ANU) iha Canberra, Australia.

Ikus liu, Komisáriu Adérito nia liafuan murak mean ne’ebe ita Timor oan sira tau iha neon no tau iha fuan kona-ba esforsu luta kontra korrupsaun iha TL mak; CAC mesak sei la hamoos korrupsaun iha Timor-Leste – kada sidadaun rai ida ne’e tenki utiliza forsa koletivu ba luta kontra korrupsaun”.

Mensajen husi Komisáriu Soares ida ne’e tenki serve hanesan mensajen importante ba Timor oan tomak nian partisipasaun iha konstrusaun nasaun. Ita uza oportunidade ida ne’e hodi tatoli katak; Every beginning has it done and every end is another new beginning!”

Nune’e, ida ne’e laos boa viajen ida ba Komisáriu Soares tamba ami hatene ita boot nian eransa sei nafatin sai reflesaun forte iha CAC nian future. (*)

Previous postComissão Anti-Corrupção (CAC) team led by Secretary Executive, Alexandre Freitas on Monday (12/5) held an integrity discussion with public servants in District Lautem and the same discussion continued in District Baucau on Wednesday (15/5) with general topic “Thematic Discussion Group of Public Servant Integrity in Timor-Leste”. More than 70 Districts Directors from all line ministers participated the discussion at Lautem and Baucau Districts Administrators office. Next postCAC Kontinua Eduka Seitór Privadu Iha Distritus Ba Prevene Korrupsaun

Popular

Eransa Ida Nebé Lori CAC Ba Iha Futuru