Featured Stories

CAC Vizita Distritu Hat; Ema 300 Partisipa Seminariu

by

Dili – Iha teritoriu Timor-Leste tomak, ema barak mai halibur hamutuk iha seminariu organiza husi Comissáo Anti-orrupçáo (CAC) hodi estuda klean liu tan kona ba sa mak korrupsaun no sa stratejia mak bele uza hodi prevene no kontra korrupsaun.

Semana ida molok tama ba iha loron Mundial anti-korrupsaun nebe monu iha loron 9 Fulan Dezembru, CAC halao seminariu iha distritu Manufahi, Ainaro, Ermera no Liquica.

Ema kuaze 300 husi prefesaun oin-oin mak mai atende seminariu ne’e; povu bain-bain, leader komunitariu, estudantes, servidor Estadu no emprezariu ho antusiasmu maka’as mai atende seminariu ne’e.

Topiku ba seminariu ne’e mak tinan ne’e mak “Integridade Nudar Fator Determinante Ida Hodi Prevene no Kombate Korrupsaun” nebe seminariu mak hanesan dalan importante ida atu CAC to’o ba iha povu no komunidade iha distritus atu haklean sira nian konhesimentu kona-ba korrupsaun.

Korrupsaun mak trava sidadaun nasaun ne’e hodi asesu no hetan servisus vital. Edifisiu Nasoens Unidas ba Krimi no Droga (UNODC) halo estimasaun katak tinan-tinan iha mundo kuaze US$ 40 billoens mak lakon liu husi atividades korrupsaun. Osan hirak nebe lakon ne’e bele afeta ba povu nia moris signifikativu tebes hanesan halo estradas ka bele prepara jerasaun foun liu husi edukasaun.

Vizita Ermera no Liquica Komisariu Adjuntu ba asuntu Edukasaun no Peskiza, Jose Neves hateten katak primeiru etapa atu luta kontra korrupsaun mak haklean povu nian konhesimentu kona-ba krimi korrupsaun.

“CAC mesak labele kombate korrupsaun – kombate korrupsaun presija Timor oan hotu nian matan, tilun no fuan,” katak Komisariu Adjuntu Neves.

“Tamba ida ne’e ita sei kontinua halao seminariu hanesan iha distritus hotu iha Timor laran tomak atu eduka no konsiensializa povu saida mak korrupsaun, oin sa korrupsaun afeta ba sira nian moris no saida mak sira sei halo kontra krimi korrupsaun,” Adjuntu Neves hatutan teni.

Sekretariu Eksekutivu CAC, Alexandre Freitas hateten antusiasmu komunidade husi diferente profesaun ba atende seminariu iha Manufahi ho Ainaro hatudu oinsa povu nian koriusidade atu halo parte iha esforsu luta kontra korrupsaun – partikularmente estudante hanesan future lideransa nasional.

“Partisipa ativamente iha prevene no luta kontra korrupsaun  hanesan potensia ba jerasaun foun nudar estudantes atu sai patriota iha Timor-Leste nian independensia agora. Ida ne’e fantastiku tebes atu hare’e alin estudantes sira mai partisipa iha seminariu ne’e maske imi feriadu hela,” katak Sekretariu Eksekutivu Freitas.

Seminariu hirak ne’e atu enkouraja administrador governu local ho komunidade sira atu dada besik liu tan CAC ba sira iha future liu husi diskusaun ka seminariu. CAC regularmente halao seminariu ho ofisial publiku no publiku em jeral iha Timor laran tomak.

To’o ohin loron, kuaze 10% servidor Estadu no ema liu 7500 mak partisipa ona iha seminariu halao husi CAC. (*)

Previous postPrevent Corruption; Deputy Commissioner Bucar Took Part In An On-Air Radio Talk Show Next postCAC Públika Rezultadu Peskiza Integridade Seitor Públiku 2013

Popular

CAC Vizita Distritu Hat; Ema 300 Partisipa Seminariu