Featured Stories

CAC Hato’o Relatóri Annual ba Dahuluk iha Sesaun Plenária Parlamentu Nasional

by

Dili – 17/05/2013—Iha tersa loraik semana ne’e, Komisáriu Komisaun Anti-Korrrupsaun Adérito de Jesus Soares hetan opportunidade primeira-vez husi Uma-Fukun Parlamentu Nasional hodi ba aprezenta Relatóriu Annual 2012 iha Sesaun Plenária. Oportunidade ne’e nudar premeitu no previlejiu bo’ot ida ba CAC atu hato’o nia panorama servisu hafoin Komisaun ne’e haríi iha tinan tolu liu ba.

Plenária ne’e Presidente Parlamentu Nasional Vicente Guterres mak prezide. Membrus Parlamentu Nasional nebé partisipa iha Sesaun Plenária ne’e liu 2/3 nebé reprezenta bankadas hat husi Partidu Konseilhu Nasional Rekonstrusaun Timorense (CNRT); Frente Revolusionária do Timor-Leste Independente (FRETILIN); Partidu Demokrátiku (PD); no Frente Mudansa (FM).

Iha aprezentasaun ne’e, Komisáriu Adérito la’os deit saliente kona-ba aktividades CAC nian nebé hala’o deit iha tinan 2012, maibe, iha oportunidade ida ne’e Komisáriu mos aprezenta panaroma jeral Komisaun nian nebé hahu servísu husi zero iha área prevensaun, investigasaun kriminal, edukasaun kampanya no peskiza durante tinan tolu nia laran. Progresu iha áreas balu nebé Komisáriu Adérito hato’o inkluindu kapasitasaun ba rekursu umanu iha rai-laran no rai-liur iha áreas investigasaun, audit, sistema buka tuir gastus publiku no formasaun iha lingua ingles no Portugues. Iha mos progresu seluk mak hanesan kampaña públiku ba distritu 13 nebé involve ofisiais governantes iha ministériu, autoridade lokal, estudantes no sosiedade sivil sira.

Iha aprezentasaun ne’e, Komisáriu Adérito ho orgulhu hato’o progresu servisus nebé CAC hala’o ona tuir lei no plánu servisu anual nomos dezafius nebé infrenta. Membrus Parlamentu Nasional sira apresia tebes ho progresu nebe CAC atinji ona maski ho rekursu nebé limitadu no reafirma sira nian apoiu politika ho moral atu CAC kontinua hala’o nafatin servisu hodi prevene no kombate korrupsaun iha Timor-Leste. Nunemos, deputadu sira husi partidu politiku governantes no husi opozisaun nian ho unanimidade fo korajen ba instituisaun CAC atu mantein servisu nebé halao tiha ona durante tinan tolu nia laran no kontinua depozita sira nian korajen atu CAC halao servisu ba oin no labele tauk ba se karik iha ameasas ruma nebé mosu iha tempu oin.

Aprezentasaun nebé hetan akompanhamentu husi Jerente Senior CAC seluk, hetan transmisaun direta husi Televizaun no Radio Timor-Leste ba teritóriu tomak iha Timor-Leste.

Previous postCAC-Komisaun A PN Forma Ekipa Trabalho ba Diskusaun Projetu Lei Deklarasaun Rikusoin. Next postTrilateral Meeting of UNCAC State Parties in Vienna

Popular

CAC Hato’o Relatóri Annual ba Dahuluk iha Sesaun Plenária Parlamentu Nasional