Dili, 07/05/2013—Esforsu atu prevene no kombate korrupsaun iha seitor públiku iha Timor-Leste, Komisaun Anti-Korrupsaun (CAC) la’os deit servisu hamutuk ho funsionáriu sivil, maibe ho mos entidade sira husi seitor militar.

Iha fulan ida liu ba, CAC hala’o seminar loron ida hamutuk ho entidades husi Sekretáriu Estadu ba Defeza. Iha semináriu ne’e partisipante sira rona no aprende informasaun kona-ba papel instituisaun militar iha prevene korrupsaun no oinsa atu hametin no hasa’e tan efektividades iha sistema kontrola iha área administrasaun, finansas no aprovizionamentu nian hodi prevene korrupsaun iha seitor militar. Semináriu hanesan mos hala’o ba entidade sira husi Sekretáriu Estadu ba Siguransa iha tinan kotuk nia rohan.

Komisáriu CAC Adérito de Jesus Soares iha nia aprezentasaun ba partisipante sira iha seminar ne’e koalia kona-ba prátika korrupsaun iha seitor públiku no risku korrupsaun iha aprovizionamentu iha seitor militar no oinsa satu prevene moras at ne’e. Iha nia aprezentasaun, Komisáriu Adérito akresenta katak instituisaun militar mos nudar komponente importante ida iha nasaun  ne’e atu servisu hamutuk hodi prevene korrupsaun iha seitor públiku.