Featured Stories

Ofisiais Governu no Sosiedade Sivil Partisipa Diskusaun kona-ba Deklarasaun Rikusoin

by

Dili, 15/11/2012Ohin, partisipantes hamutuk 70 resin reprezenta Orgaun Estadu hat (Prezidente Repúblika, Parlamentu Nasional, Governu no Judisiaria) no Organizasoens Sosiedade Sivil, inkluindu Media, partisipa iha diskusaun meza redonda kona-ba importansia atu estabelese mekanismu kontrolu ida nebé efikaz relasiona ho deklarasaun rikusoin. Partisipante sira ne’e, barak liu mak partisipa tiha ona iha diskusaun meza redonda dahuluk nebé CAC organiza hamutuk ho Gabinete Inspeitor Jeral iha fulan Juñu tinan 2012.

Diskusaun meza redonda nebé hala’o iha edifisiu foun CNE nian iha Caicoli Dili, organiza hamutuk entre CAC no Parlamentu Nasional Komisaun A. Diskusaun ne’e nia objektivu mak atu halibur hamutuk hanoin no pontu-de-vista krítiku husi reprezentantes oi-oin atu hariku liu tan konseitu kona-ba deklarasaun rikusoin molok kria mekanismu legal ruma nebé pertensia ba asuntu ne’e.

Diskusaun ohin ne’e loke husi Presidente Parlamentu Nasional Vicente Guterres. Reprezentante ida husi Gabinete Prezidente Republika mak le’e Prezidente Taur Matan Ruak nia diskursu suportivu ba sorumutu ne’e.

Panelistas iha diskusaun ida ohin hamutuk na’in hitu: Prezidente Tribunal Rekursu Claudio Ximenes, Prezidente Komisaun A Carmelita Caetano Moniz, Xefe Bankada Partidu Opozisaun Fretilin Antoninho Bianco, Ministru Estadu no Prezidente Konseilhu Ministrus Agio Pereira, Komisáriu Adjuntu CAC José António de Jesus das Neves, Prokurador Distritu Dili Vicente Fernandes Brito no Prezidente Defensoria Públiku Sergiio Hornai.

Pontus xave balu nebe diskuti iha meza redonda ne’e inkluindu importansia atu kria lei ida kona-ba deklarasaun rikusoin, kriasaun mekanismu kontrolu ida nebé efikaz ba verifikasaun rikusoin no sistema ne’e tenki refleta kontekstu Timor-Leste nian no persija atu estabelese estratejia nasional ba kombate korrupsaun.

Diskusaun ohin ne’e la’o iha atmosfera ida ke pozitivu tebes no konstrutivu. Ne’e hatudu boa-vontade no komitementu husi partisipantes tomak iha sorumutu ne’e. Asaun tuir mai mak atu kria grupu trabalhu ida nebe konsiste husi reprezentantes husi Orgaun Estadu hat ne’e, inklui Sosiedade Sivil hodi prepara matérias no informasaun molok atu kria mekanisnu no enkuadramentu legal ruma relasiona ho deklarasaun rikusoin.

CAC sei servisu hamutuk ho Sekretáriadu Komisaun A Parlamentu Nasional nian atu prepara sumáriu exekutivu ida husi sorumutu ida ohin. Nia rezultadu sei fahe hotu ba partisipante sira nebe marka prezensa iha diskusaun ne’e.  

Previous postCAC-Parlamentu Nasional Organiza Diskusaun Meza Redonda kona-ba Deklarasaun Rikusoin Next postState and Non-State Actors Jointly Discuss About Asset Declaration

Popular

Ofisiais Governu no Sosiedade Sivil Partisipa Diskusaun kona-ba Deklarasaun Rikusoin