Featured Stories

CAC-PNTL Asina Akordu Koperasaun

by

Dili – Ohin Sesta-Feira loron 7/9/2012, Komisáriu Komisaun Anti-Korrupsaun (CAC) Adérito de Jesus Soares ho Komandante Jeral Polísia Nasional Timor-Leste (PNTL) Longuinhos Monteiro asina akordu kooperasaun ida hodi formaliza servisus kombate korrupsaun iha Timor-Leste. Akordu kooperasaun nebe asina iha edifisiu CAC, Farol, Dili kobre apoiu servisu investigasaun nian, uza fasilidades, halo formasaun hamutuk no seluk tan entre instituisaun estadu rua ne’e ba asuntu kombate krími korrupsaun iha Timor Leste.

Komisáriu Adérito de Jesus iha nian intervensaun sublinha katak akordu kooperasaun entre CAC-PNTL ne’e hanesan pasu importante ida iha prosesu dezenvolvimentu instituisaun CAC ne’ebe sei foun, hodi nune, servisu kombate korrupsaun iha Timor-Leste hetan kooperasaun no diak liu tan ho instituisaun seluk.

Iha akordu ne’e PNTL sei ofrese tulun balu ba apoia servisus investigasaun kriminal relasiona ho kázus korrupsaun, loke espasu ba CAC hodi uza fasilidades PNTL nian balu no formasaun konjunta entre CAC no PNTL. Materia formasaun nian sei determina hamutuk bazeia ba nesesidades no rekursus nebe iha.

Iha oportunidade ne’e, Komandante Jeral PNTL Longuinhos Monteiro lori komando jeral PNTL nian naran hato’o apresiasaun máximu ba inisiativa CAC hodi hahu halo diskusaun kona-ba kooperasaun servisus ida ne’e, no ikus mai bele realiza duni akordu kooperasaun entre instituisoens estadu rua ne’e.

Komando Jeral PNTL iha nia diskursu badak hatete katak PNTL sei desponibiliza i depozita PNTL nian rekursu tomak kualker fatin no tempu no sei kolabora diak ho instituisaun CAC para servisu hodi luta hasoru kompleksidade aktus krimi korrupsaun ohin loron nian hanesan krimi finanseira no ekonómiku, atu bele efektivu liu tan.

Komandante PNTL Longuinhos Monteiro hatudu komprimisu atu implementa akordu ne’e hahu ohin loron kedas hodi aloka entidades PNTL balu ba CAC hodi fo apoiu ba investigadores CAC nian nebe halo servisu investigasaun kazuz krími korrupsaun hodi alkansa objektivu kombate krími korrupsaun iha rai ida ne’e.

Iha tempu besik mai, instituisaun rua ne’e diside sei halo diskusaun liu tan kona-ba detalhas oinsa atu implementa akordu ne’e ho didiak.

CAC ho PNTL servisu hamutuk kleur ona desde CAC harii iha 2010. Nudar polisia espesializada, tuir lei, CAC ho PNTL nia natureza funsaun hanesan deit maski CAC konsentra aan ba deit kazus korrupsaun.  Estrutura organizasaun entre sira na’in rua mak lahanesan. Ne’e signifika katak CAC la’os deit halo investigasaun ba kazus krimi korrupsaun, maibe CAC mos bele halo kapturasaun ba suspeitus sira iha fatin wainhira kaer ho matan.

Previous postCAC halo Audiensia ba Dahuluk Ho Komisaun A Parlamentu Nasional Next post Commissioner of the Anti-Corruption Commission Adérito de Jesus Soares becomes one of the keynote speakers at one-day workshop organized by the Ministry of Education at the Dili Convention Centre, today 24 September 2012.

Popular

CAC-PNTL Asina Akordu Koperasaun