Featured Stories

CAC halo Audiensia ba Dahuluk Ho Komisaun A Parlamentu Nasional

by

Dili, 6/9/2012 Komisáriu Komisaun Anti-Korrupsaun (CAC) Adérito de Jesus Soares ho nia Ekipa, horiseik dader halo sorumutu ba dahuluk ho Prezidente Komisaun A Parlementu Nasional Carmelita Caetano Moniz ho nia Ekipa iha Salaun Sorumutu Komisaun A. Komisaun A Parlamentu Nasional Terseira Lejislatura toma-konta asuntus direitu konstitusional, justisa, administrasaun publika, no anti korrupsaun.

Audiensia durante oras rua ne’e fo oportunidade ba CAC hodi informa ba Komisaun A kona-ba servisus lubuk ida nebé CAC hala’o durante ne’e no planu servisus ba oin. Informasaun hirak ne’e inklui progresu servisu iha área investigasaun krimi korrupsaun, prevensaun, edukasaun kampaña, trasa plánu estratéjiku CAC ba 2020, involvimentu Timor-Leste iha servisus relasiona no Konvensaun ONU kontra Korrupsaun (UNCAC), nomos dezafius nebé enfrenta iha área servisu hirak ne’e liu-liu relationa ho rekursus umanus no fatin ba servisu. Kona-ba servisus ba tempu oin, CAC aprezenta konseitu ida kona-ba deklarasaun rikusoin no hein katak iha tempu besik mai Parlamentu Nasional ho CAC sei realiza diskusaun meza-redonda ida hodi loke dalan ba diskusaun kle’an liu ba asuntu ne’e nomos sei koalia kona-ba oinsa hakat ba oin. Informasaun seluk mak kona-ba nesesidades atu hamosu plánu estratejia nasional ba kombate korrupsaun iha Timor-Leste.

Esplikasaun ne’e hetan apresiasaun bo’ot husi Prezidente Carmelita Moniz no Membrus Komisaun A nian sira husi Partidu CNRT,  FRETILIN, no Frente-Mudansa. Reprezentante husi PD la marka prezensa tamba iha asuntu seluk.

Hafoin rona informasaun husi Ekipa CAC, membru Komisaun A sira hetan oportunidade halo perguntas no komentárius. Iha tempu neba, Deputadu sira espresa sira nia apoiu polítiku máximu ba servisus nebe CAC halo ona no plánu atu halo, enkoraja CAC atu kapasita aan liu tan hodi hametinliu tan instituisaun CAC. Sira tatolin atu CAC mantein servisu diak nafatin hodi kontinua hametin kolaborasaun ho instituisaun sira seluk iha rai laran no iha rai liur atu halo servisu kombate korrupsaun efektivu liu tan.

Molok ramata, Komisáriu Adérito propoin ba Komisaun A atu halo sorumutu regular entre CAC no Komisaun A atu fahe informasaun ba malu. Proposta ne’e hetan apresiasaun pozitivu tebes husi Prezidenti Komisaun A ho nia Ekipa tomak no parte rua deside katak sorumutu regular ne’e sei hala’o kada trimestral. Iha tempu oin mai, Ekipa Komisaun A sei halo vizita mai edifisiu CAC hodi hare diretamente kondisaun no servisus Komisaun nian.

Previous postFunsionárius Linhas-Ministérias Simu Matéria kona-ba Anti-Korroupsaun Next postCAC-PNTL Sign a Cooperation Agreement

Popular

CAC halo Audiensia ba Dahuluk Ho Komisaun A Parlamentu Nasional