Featured Stories

Kadete Foun PNTL Na’in 250 Tuir Aula kona-ba Anti-Korrupsaun

by

Dili, 10/08/2012—Kadete foun feto no mane Polisia Nasional Timor-Leste (PNTL hamutuk 250 ohin dader tuir aula kona-ba anti-korrupsaun husi Komisáriu Adjuntu Komisaun Anti-Korrupsaun José de Jesus das Neves iha Akademia Polísia Comoro, Dili. Aula ne’e fahe ba sala rua, kada sala hamutuk kadete foun 125 mak partisipa.

Aula durante oras rua husi Komisáriu Adjuntu ne’e foka kona-ba hasa’e tan koñesimentu kadete foun sira kona-ba servisu CAC nian, inklui Komisaun nia mandatu, kompetensia nudar polisia kriminal espesializada, no tipu korrupsaun hanesan preve ona iha Kódigu Penal Timor-Leste nian. 

Polisia National Timor-Leste nudar instituisaun Estadu ida nebe tane áas Lei no Orden, sira tenki iha koñesimentu kle’an kona-ba servisu CAC nian, atu nune bele kopera diak liu tan no bele traduz servisu kona-ba kombate korrupsaun ho asaun konkretas hamutuk ho instituisaun públiku sira seluk no Organizasaun Sosiedade Sivil nian sira.

Komisaun Anti-Korrupsaun, iha nia vizaun ba tempu naruk, hakarak hare katak iha tempu oin mai, PNTL atu adopta no inkorpora matéria kona-ba anti-korrupsaun iha Akademia Polisia nia kuríkulu ba membrus polisia hotu atu aprende kona-ba asuntu ne’e.

Aula ohin dader ne’e hetan atensaun bo’ot husi partisipantes sira iha sala rua ne’e. Partisipante sira hatudu kuriosidade hakarak atu aprende diak liu tan no husu perguntas oioin konaba isu-isu korrupsaun iha Timor-Leste no papel polisia iha servisu kombate korrupsaun.

PNTL nudar CAC nia parseiru importante ida iha luta hasoru korrupsaun in nasaun ne’e. Durante ne’e, PNTL hatudu koperasaun diak no suporta tebes CAC nia servisu iha area prevensaun no investigasaun kriminal relasiona ho hahalok korupsaun sira.

Previous postCAC Publika Terseiru Edisaun Buletin Integridade Next postCoordination Meeting between CAC and PSC Senior Management

Popular

Kadete Foun PNTL Na’in 250 Tuir Aula kona-ba Anti-Korrupsaun