Featured Stories

Investigadores Foun Lima Ramata Kursu no Simu Tomada-de-Pose Ohin

by

Dili, 29/08/2012–Investigadores foun na’in lima Komisaun Anti-Korrupsaun (CAC) nian, Kuarta-feira ohin simu tomada-de-pose hafoin kompleta formasaun iha CAC durante fulan rua kona-ba asuntus tékniku oi-oin relasiona ho investigasaun kriminal ba kazus korrupsaun nian. Iha seremonia tomada-de-pose ne’e, finalista sira simu sertifikadu graduasaun husi Dirijente Altu CAC nian sira.

Graduadores foun na’in lima ne’e haksolok halo hotu sira nia formasaun espesializada nebe tulun fortalese sira nia koñesimentu tékniku no habelar tan sira nia vizaun kona-ba oinsa atu kaer servisu investigasaun kriminal ba kazus korrupsaun ho efektivu liu tan no profesional. Hanesan investigador foun ida hatete: …”Kualker formasaun espesializasa ida sempre diak ba dezenvolvimentu kapasidade no koñesimentu ema nian—formasaun foin lalais ne’e tulun ho haforsa tebes ami nia kapasidade no koñesimentu tékniku atu dezenpenha ami nia servisu ho konfiansa bo’ot liu tan.”

Formasaun durante fulan-rua ne’e hetan suporta husi USAID liu husi fundus Millennium Challenge Corporation nebe implementa husi CASALS iha Dili.

Dirijente Senior CAC no funsionárius CAC tomak haksolok ho rezultadu formasaun ida ne’e tamba ne’e mak nudar interese bo’ot Instituisaun nian atu haforsa no kapasita nia rekursu umanus hanesan parte ida husi prosesu dezenvolvimentu instituisaun nian. Wainhira koalia iha seremonia tomada-de-pose ne’e, Komisáriu CAC Adérito de Jesus Soares hatete katak nudar instituisaun, CAC hakarak tebes atu investe ba nia rekursu umanus, CAC hakarak kapasita nia staff sira hodi tuir formasaun iha rai-laran no rai liur hodi habelar sira nia koñesimentu. Ne’e hanesan prioridade CAC nian nebé refleta iha nia plánu estratéjiku tinan rua mai.

Ho investigadores na’in lima ne’e, oras ne’e CAC iha ona investigadores hamutuk na’in 15 nebé prontu atu kontinua halo servisu investigasaun ba kazus kriminal nebe relasiona ho korrupsaun. Iha espetativa katak ho sira na’in lima nia involvimentu, sei halo kamaan servisus no divizaun servisu entre investigador sira diak liu tan.

Previous postKomisáriu CAC Apresia ho Asaun Prezidente Ruak Halo Deklarasaun Rikusoin Next postCivil Servants from Different Line-Ministries Learn about Anti-Corruption

Popular

Investigadores Foun Lima Ramata Kursu no Simu Tomada-de-Pose Ohin