Dili 1/08/2012–Durante semana tomak iha semana liu ba, Komisáriu Adjuntu Manuel Bucar lidera ekipa Komisaun Anti-Korrupsaun (CAC) vizita distritu rua, Ainaro no Same, hala’o seminárius hamutuk ho funsionáriu públiku distrital husi linhas ministérial, inklui Polisia Nasional Timor-Leste (PNTL),  no lideransa komunitáriu sira hamutuk atus ida tolu-nulu resin.

Semináriu sira ne’e koalia kona-ba kombate korrupsaun iha seitor públiku ho nia tema: “Ita Rasik Mak Dezenvolve Ita Nia Nasaun no Salvaguarda Sasan Sira Nebe Mak Movel no La Movel ba Moris Diak Povu Nian.”

Workshop nebe hetan apresiaaun diak tebes husi partisipante sira iha distritu rua ne’e hanesan atividade rutina ida husi diresaun prevensaun atu transmiti informasaun ba funsionáriu distrital no  lideres komunitáriu sira kona-ba Lei No. 8/2009 Komisaun Anti-Korrupsaun nian. Pontus importante nebe koalia iha sorumutu hirak ne’e foka ba artigu 5 pontu1 nebe koalia kona-ba sensibilizasaun–hanesan limita lala’ok korrupsaun, motiva ema atu kuidadu ho sira nia lala’ok no reduz lala’ok hirak nebe lori ka fasilita korrupsaun sira iha Timor-Leste.

Objetivu seluk husi semináriu ne’e mak hamosu diskusaun krítiku no konstrutivu iha funsionáriu públiku no lideres komunitáriu sira hodi loke no habelar sira nia konsiensia kona-ba lei CAC no dokumentus legal seluk no kria metódu kontrolu ida nebe efikaz iha servisu administrasaun, finansas, no aprovizionamentu hodi minimiza risku korrupsaun. 

Esperiensia nebe CAC hetan husi semináriu hirak ne’e maka partisipante sira husi distritu rua ne’e hato’o komitementu atu kolabora diak ho instituisaun CAC hodi halo kontrolu máximu ba ekzekusaun orsamentu estadu ba implementasaun projeitus PDD, PDL, no fundu sira seluk iha distritu Ainaro no Same.