Featured Stories

Timor-Leste no Liberia Selesionadu nudar Reviewer ba Implementasaun Konvensaun ONU kontra Korrupsaun iha Angola

by

Dili, 29/06/2012—Durante sesaun ba datoluk grupu halo revizaun  ba implementasaun (Implementation Review Group) ba Konvensaun Nasoens Unidas kontra Korrupsaun (UNCAC) iha Vienna, Timor-Leste no Liberia selesionadu atu halo revizaun hamutuk ba Angola nia implementasaun. Selesaun ne’e hala’o iha 18 Juñu 2012 iha reprezentantes Estadu Parte ba Konvensaun sira nia oin.

Prosesu halo revizaun ba Angola ne’e halo parte husi Siklu Dahuluk husi Mekanismu halo Revizaun konaba implementasaun Konvensaun ONU ne’e. Iha espetativa katak servisu halo revizaun ne’e sei hala’o iha tinan ne’e nia laran, tuir  preparasaun nebe Angola sei halo wainhira sira prosesu revizaun liu husi meza (desk review) remata. Ba Timor-Leste nudar Estadu Parte nebe sei halo servisu revizaun ba Konvensaun nia implementasaun, servisu ne’e sei involve halo estudu no análiza kle’an ba leis no regulamentus no evidensia sira seluk nebe iha relasaun ho UNCAC nia implementasaun iha Angola. Nunemos, servisu ne’e karik sei involve vizita direta ba terenu wainhira Estadu Parte Angola permite. Revizaun ba Konvensaun ne’e konsentra ba Kapitúlu III konaba Penalizasaun no Implementasaun Lei no Kapitúlu IV konaba Koperasaun Internsional.

Semana kotuk, Timor-Leste aprezenta ona lista peritus governantes na’in lima ba Sekretáriadu Mekanismu halo Revizaun (Secretariat Review Mechanism) atu halo selesaun. Peritu sira ne’e mak sei partisipa iha prosesu halo revizaun ba Angola nia implementasaun.

Timor-Leste nia papel nudar Estadu Parte halo revizaun ba UNCAC ne’e hanesan esperiensia ba dahuluk hodi hala’o tarefa internasional ne’e. Komisáriu Anti-Korrupsaun Adérito de Jesus Soares hatete katak, “Partisipasaun Timor-Leste nian iha prosesu halo revizaun ne’e hatudu katak Timor-Leste iha komitementu bo’ot atu implementa nia dever hanesan membru Estadu Parte ba Konvensaun ONU ne’e.”

Tinan kotuk, Timor-Leste a’adia nia dever sai nudar Estadu Parte atu halo revizaun ba Cabo Verde nia implementasaun. Timor-Leste deside hakarak atu estadu parte seluk, Namibia no Fiji, mak halo revizaun uluk ba nia implementasaun, atu nune bele fo tempu atu prepara didiak no bele aprende husi rai seluk nia esperiensia antes kumpri nia dever.

Reprezentante Timor-Leste nian iha eventu sorumutu sesaun ba datoluk grupu halo revizaun  ba implementasaun ne’e mak Komisáriu Adjuntu Anti-Korrupsaun José António de Jesus das Neves no akompanha husi Claudia Sayago husi UNMIT.

Previous postSumáriu Ekzekutivu konaba Revizaun ba Auto-Avaliasaun ba UNCAC nia Implementasaun iha Timor-Leste Aprovadu no Publikadu Next postAbout one thousand students from elementary to secondary levels from Bobonaro, Aileu, and Liquiça districts participate in the Anti-Corruption Commission (CAC) seminars on the role of CAC in combating corruption with a theme “Together We Fight Corruption”

Popular

Timor-Leste no Liberia Selesionadu nudar Reviewer ba Implementasaun Konvensaun ONU kontra Korrupsaun iha Angola