Dili, 21/6/12 – Ekipa Komisaun Anti-Korrupsaun (CAC), iha Kuarta-Feira horiseik, hala’o sorumutu kortezia ba dala-uluk ba Prezidenti Republika Taur Matan Ruak (TMR) iha Palasiu Prezidenti Nicolau Lobato Aitarak-Laran, Dili.

Objektivu husi sorumutu kortezia ne’e, aleinde de kongratula Prezidente Repúblika nebe foin simu pose fulan kotuk, delegasaun CAC mos informa ba ulun bo’ot nasaun Timor-Leste ne’e kona-ba servisu instituisaun CAC nian. Iha ne’e, Komisáriu Adérito de Jesus Soares informa CAC nia servisu konsentra iha áreas importante tolu: edukasaun kampanha no peskiza, prevensaun, no halo investigasaun ba lala’ok  korrupsun. Iha sorumutu ne’e mos, ulun bo’ot CAC nian hato’o kona-ba difikuldades nebe CAC hasoru durante hala’o nia knaar.

Prezidenti TMR agradese ba esforsu tomak nebe halo ona desde instituisaun CAC harii tinan rua liu ba, katak maske foin harii, CAC halo ona kontribuisaun signifikante ba prosesu kombate korrupsaun iha nasaun Timor-Leste. Prezidente mos hatutan katak nia rasik prontu atu servisu hamutuk ho CAC hodi kombate korrupsaun iha Timor-Leste.

Iha vizita kortezia ofisisal ba dala-uluk ne’e, Komisáriu Aderito de Jesus akompanha mos husi Komisáriu Adjuntu Manuel Bucar, Sekretáriu Ekzekutivu Alexander Freitas no Direitora Maria de Vasconselhos.