Featured Stories

CAC Hala’o Diskusaun ho no Halibur Informasaun husi MI no Iskola Sekundaria iha Dili

by

Dili 12/06/2012–Iha Kinta semana kotuk, ekipa Komisaun Anti-Korrupsaun (CAC) hala’o sorumutu ho ekipa husi Ministériu Infrastrutura (MI) ho nia objektivu atu CAC hetan informasaun kle’an kona ba oinsa servisu MI nian durante mandatu IV Governu Konstitusional, oinsa ekzekuta no implementa program dezenvolvimentu, inklui prosesu aprovizionamentu no siklu projektu infrastrutura.

Iha oportunidade ne’e, ekipa CAC hetan esplikasaun balu husi autoridade másimu MI nian kona-ba prosesu ekzekusaun orsamentu jeral estadu, aplikasaun prosedimentu legál, implementasaun polítika no natureza servisu prosesu aprovizionamentu. Alein de ne’e, ekipa CAC mos rona esplikasaun kona-ba desafiu no obstaklu servisu durante iha terrenu no oinsa lideransa iha Ministériu no nia Sekretárius Estadu sira enfrenta dezafiu sira ne’e.

Iha sorumutu nebe hala’o iha Edifisiu Ministériu Infrastruture ne’e, ekipa CAC nian lidera husi Komisáriu Adjuntus nain rua, Manuel C. C. Bucar Corte-Real no José António de Jesus das Neves no husi Ministériu Infrastrutura lidera husi Ministru Infrastrutura Pedro Lay no nia Vice-Ministru José Carrascalão.

Iha okaziaun seluk, iha Kuarta semana kotuk, CAC realiza sorumutu preliminária ho diretores eskolar eskola sekundária rua iha Dili no koalia kona ba oinsa atu motiva edukador sira hodi iha kreatividade no inisiativa  atu transforma konseitu valor moralidade iha prátika hanesan– honestidade, displina, respeitu-malu, responsabilidade, integridade ho seluk tan ba estudante sira iha iskola fatin.

Iha sorumutu ne’e, Diretur Diresaun Edukasaun Kampanha no Peskiza CAC, Rosário de Araújo, fahe hanoin konaba kantina honestidade hanesan ezemplu ida husi prátika moris lor-loron nian iha iskola fatin, nebe eskola sira sei bele harí’i kantina honestidade ne’e ho sira nia kreatividades, meius no rekursus rasik.

Konseitu ne’e hanesan baze ida ba formasaun edukasaun anti-korrupsaun iha iskola fatin nebe hahu kedas husi baze.

Autoridades eskolar nebe tuir sorumutu ho CAC hamutuk ho Komisáriu Adjuntu Neves ho nia ekipa mai husi Eskola Sekundáriu Publiku 4 de Setembro Balide no Eskola Sekundáriu Colégio Sagrado Coração de Jesus Becora.

 

Previous postKomisáriu CAC Partisipa Konferensia ICHA iha Washington Next postKomisáriu CAC Fila Hikas Mai Timor-Leste husi Estadus Unidus

Popular

CAC Hala’o Diskusaun ho no Halibur Informasaun husi MI no Iskola Sekundaria iha Dili